MIHIN MET AUTO PANHAAN?

Pysäköikää autot tien järven puohleisseen reuhnaan, keula etehlään päin. Vääräle puolele pysäköiyt autot met aatelthiin nostaa umpisheen (muistakkaa motkottaa asiasta kansaneustajille).

MISSÄ SE PILKKIALUE OLIKHAAN?

No sehän löytyy hotellin rannasta. Alue on merkattu mustala töhnälä. Aluheele saapi mennä vasta alotuslaukhauksen jälkheen.

MISTÄS NIITÄ PILJETTEJÄ SAAPI?

Piljettejä saapi neitosilta joita näkyy kaupan ja hotellin pihala ja myyntitiskeilä.

MISSÄ, KOSKA JA KELLE NET PALKINNOT JAETHAAN?

Pilkkisäännöt julkasthaan pilkkipäivänä ennen kilpailun alkua. Palkinnot jaethaan kaupan pihala sunnuntaina iltapäivälä. Palkinnot mennee enssijasesti alamitan ylittävien kalojen saajile.  Loput sijotukset arvothaan. Keskimäärin kaloila on saatu pari palkintoa per päivä. Ylimääränen sijoitusten arvonta on heti palkintojenjaon jälkheen,

TULIKO SAIHRAUS?

Ei hättää. Meilon oma kisalääkäri joka päivystää lähitiehnoila. Valvojat ottavat tarvittaessa siihen yhteyen. 

HENGEN RAVINTOA

Rajaseutupappi on paikala sunnuntaina. Hän pittää hartaushetken ennen kisoja kaupala.

ENTÄS SE KULTTUURI?

Kulttuurista molhaan huolehittu. Kisojen virallinen oopperateltta on kaupan eteläpääyssä. Sen tet löyättä mölinän perusteela. Sielä saapi laulaa kovvaa ja korkealta, yksin ja yhessä, nuotilheen ja nuotin vierestä.

TRAFIIKKI

Palluumatkala on liukasta. Uskokaa pois, liukasta on. Aivan riippumatta siittä minkälainen keli on. Noppeusrajotuksia häätyy nouattaa!

MINKHÄÄNLAINEN SE SÄÄ SITTE ON?

Matalapainhneen keskus on ylittäny meät. Jos hyvin käy niin met olhaan koko kisa-ajan lempeässä ja kuivassa yläpilvisessä auringonpaistheessa. Voi se toissaalta nakata pari kuuroaki. Satheen ja pilvettömän mahollisuuet on kovin epätoennäkösiä, mutta sen me luppaama että jonkullainen sää meilä kuitekki on. Ja yölä on pakkasta.

MITÄ MUUTA?

Ei mithään muutako pilkkimhään sitte vain. Muista kairata reikä.